打羽毛球變打石膏的一次經歷

我的第一次-打石膏，就是在剛過去的星期日發生...

話說上星期六，因為想支持一下教會的新朋友打羽毛球，所以我決定再次打羽毛球。

其實，打羽毛球的過程，一點都不激烈，但正在大家不為意的時候，

我竟然不知何故，忽然「拗柴」。

我的右腳踝即時腫脹像汽球吹脹一樣(其實有點誇張)。

起初，我心想：「拗柴」都已經唔係第一次啦，而且之前都係傷這隻腳，

或許又係拉傷韌帶，唔使call白車(救護車)咁誇張啦！

不過，腳腫加了冰敷，似乎沒有改善，所以都係聽話，接受教會的保安建議，召救護車入院。

一上車，司機問我返哪個團契，想不到連司機都是跟我返同一間教會兼同一個團契的弟兄。

入醫院急診室，已經不是第一次啦；今次，估唔到仲係搭救護車入嚟！

先在分流站作簡單檢查。

等了十分鐘左右，輪到我見醫生。

大概一個小時，我終於可以照x-ray。

不幸地，醫生看完x-ray底片，告訴我：

「你右腳踝兩邊骨裂，你可以先返屋企，明天一早再返來打石膏，

或者，選擇即時入院，等明早再打石膏。

不過，你仲要等星期一見物理治療師，學用拐杖。」

我最終選擇留院，免得兩頭騰加重傷勢。

哈，上房後不久，護士通知：暫時斷水斷糧...

吓！唔係掛？！

好彩，過多一陣(都成個幾鐘)，見完骨科醫生，終於有水有糧：可以飲水同食個包！

星期日(29/11)早上，五六點就叫醒人，吃過早餐，等八點幾見醫生。

一個靚靚女醫生見我，她告訴我一個好消息和一個壞消息，

冇得揀聽邊個先，

壞消息係右腳腳踝內外骨裂(即骨折的一種)，要打石膏，等6-8星期先可以拆；

好消息係唔駛開刀做手術同鑲螺絲；

不過，拆完石膏，腳的肌肉會萎縮，要再做6-8星期的物理治療，才可能完全康復。

唔係掛？！我以為「拗柴」，最多兩三個禮拜就可以好返啦，原來前前後後成3-4個月。

醫生仲話可以一次過俾三個月假期過我，

我就嚇得叫佢暫時俾住兩個星期先啦！

兩個禮拜後，我會第一次覆診，醫生到時又會開假俾我啦。

星期日，當媽咪將叉好電嘅電話交俾我，我第一時間上Facebook update status啦！

call完上司、老闆交待請假的事後，就不停收到唔同嘅電話問候啦！

之後，又call鄰居，等佢地返工唔駛等我。

下晝，又有好多姊妹嚟醫院支持我，

阿Cin，阿車，愛麗詩同安芝，仲有入唔到病房的許多弟兄姊妹，

特別要鳴謝阿多同阿un的Jumbo Hello Kitty珍寶珠，真係好大枝嫁！

到探病時間，二花竟然買咗安怡高鈣奶，氣死人！

平日都冇咁聽話，今次建仔話我骨質疏鬆，要多啲鈣質，

佢就即時送到！不過，都好多謝二花的，hehe...

Salin因為組長訓練唔見我，就一早call我，所以知我入院。

佢都好有心，買咗啲健康零食-藍莓乾同葵花籽俾我，

又同我&二花影相。

Salin果然係Salin，幾時都帶相機，拍低每一刻。

之後，又有Judy, Janis同一位活B姊妹帶薯片、朱古力同飲料俾我。

兩個鐘探病時間，轉眼間又過去啦！

夜晚，休息一下，又等第二日出院啦！

星期一，見醫生，再見治療師。

治療師教我用拐杖行平地後，我終於可以落地去洗手間，yeah!!

之後，治療師再教我行樓梯。

行樓梯嘅口訣係「上天堂，落地獄」，

即係上用好腳，落就用傷腳。

上落樓梯兩轉已經出晒汗，相當辛苦。

下晝等媽咪放學，終於可以返屋企。

只係上樓梯，冇諗過平日只係3分鐘時間，今日要行成廿分鐘，辛苦死我！

上樓梯期間，我心諗：又係減肥嘅時候啦！

在呢件事上，我仍然要向神感恩！

如果唔係入醫院，自己堅持返屋企，

我的傷勢真係難以想像。

PS: 我的家人，多謝你地！

媽咪真好，細佬真好，細妹真好！

如果唔係你地，我連街都去唔到啦！