打石膏後的生活寫照-第三週

打石膏後的第三週 14.12.2009~20.12.2009

生活開始完全適應...

睇完「敗犬女王」又開始惆悵睇邊套台劇。

開始整理自己：身、心、靈，都十分需要整理！

星期二，翡麗絲同埃米莉來了新星吃飯探我。

二花開完冗長的會議都來找我地傾下計。

自從上星期六閞始皮膚敏感，星期一左手已經慢慢康復，

但右手情況就...

皮膚敏感得又紅又腫，皮膚佈滿像水痘似的東西，

嚇得大家都在Facebook回應。

老實說，我都有點擔心，

問題係我認識的皮膚科醫生都在香港島，

at least要三個星期前預約，

而且上星期多上街一次，

我的手開始痛，

很難用拐杖落樓梯，

基本上不可能去睇醫生，

所以打算休息一兩天後，

再視乎情況，找朋友介紹九龍區的皮膚科醫生。

多謝翡麗絲、埃米莉同二花的探望，

而翡麗絲知道我皮膚敏感後，

仲打電話叫她的老公拿了一支藥膏給我試試。

結果，情況真的有點改善，

我亦可以留在家中好好休息啦！

同樣，星期四，返教會。

多謝阿拔義載，我可以很快去將軍堡吃晚飯；

離開時，更多謝阿倫組長目送我地上拔家車後才搭的士。

拔嫂很細心，送我到家樓下，還幫我開了地下的大門才離開。

Million thanks，阿仙！

本週最開心的，莫過於星期日夜晚去UA iSquare IMAX睇Avatar阿凡達。

上星期安芝提議，點知佢當晚居然要同家人食飯，

所以我地剩下阿倫、阿全、雲迪同我去睇。

雖然星期日要一百七十蚊，不過真係物有所值，

皆因全套戲都係3D；

記得上次係Megabox IMAX睇Harry Potter，

只得10多分鐘，好彩係契女爹爹請，

otherwise我實喊。

由頂至底的大銀幕，加上立體聲音響，

寬敞舒適的坐位，

加上一流的電影，

兩個半小時的享受，

都係收一百七十蚊，真係物有所值。

這齣戲係Titanic的導演James Cameron籌備了十四年的作品，

連一向有彈冇讚的石琪先生，

都大讚電影：故事簡單但真人與科技效果配合得淋漓盡致云云，

所以我對這套電影抱相當大期望去睇。

結果，果然冇令我失望。

故事的確十分簡單，

但係科技動畫的部分同真人實景果然配合得天衣無縫。

而我印象最深的畫面，就係晚上當人在潘多拉Pandora星球的森林

步行時地下的植物一棵一棵亮燈，如水母般的種子在空中飄浮的畫面，

實在把我吸引住。

再講，有些飛行的場面，就連我身旁不認識的男士都出跟住主角左搖右擺，

大家就明白電影的迫真度有多高。

如果大家會睇Avatar，強烈建議大家去兩間IMAX睇！

睇完戲，居然在戲院電梯遇到嘉文弟兄，

相請不如偶遇，

大家去樂道的杏花樓吃吃甜品，為整天劃上完滿句號。

再次鳴謝阿倫弟兄協助截的士，仲等我地上車後關車門；

雲迪又陪我先返屋企後再回家，多謝你地。